आकाश..

आपणचं करावं आपलं मोकळं आकाश,

अन सुसाट धावावं वेगात खुशाल..

कशाला हवी खंत कोण आहे पुढे,

मागे ज्यास यावयाचे त्यास येवूद्या बापुडे,

आपण रहावे मात्र आपल्याच जोशात..

अन सुसाट धावावे वेगात खुशाल..१

सोबत घ्यावे कुणीतरी आपल्यासारखेच खुळे,

ज्याच्यासंगे आपली विचारांची नाळ जुळे,

नाहीच आले कुणीतरी हट्ट नका करू बरे,

आपले आकाश आपले असते हेच खरे,

रंगून जावे आपण आपल्याच रंगात..

अन सुसाट धावावे वेगात खुशाल..२

प्रकाशेल आपल्याही आकाशात  इंद्रधनु, 

चला नाही तर,आपणच फुलपाखरू बनू,

रिमझिम पाऊस ही बरसेल आपल्या आकाशात,

पारिजातकाचा सडाही पडेल त्याच खर्जात,

अहंकाराचा पिळा मग कशाला ठेवायचा मनात..

अन सुसाट धावावे वेगात खुशाल..3